پاکستان ميټرولوجيکل ډيپارټمنټ (PMD)  سیند، بلوچستان او پنجاب صوبو ته د وچکالۍ خبرداری ورکړی دی. د ځکه چې هلته ډېر کم باران شوی دی.

دا خبرداری د ګل په ورځ خپور شو او خبرداری یې ورکړی چې په دغو سیمو کښې به وچکالي دوام وکړي. سره له دې چې په مرکزي او شمالي پاکستان کښې د وروستیو بارانونو له امله حالات ښه شوي دي.

پاکستان ميټرولوجيکل ډيپارټمنټ وايي چې د مارچ د میاشتې اوسط تودوخه د هېواد په جنوبي نیمایي کښې د معمول په پرتله ۲-۳ درجې سانتي ګريډ زیاته ده او ځینو سیمو کښې له ۲۰۰ ورځو څخه ډېرې وچې ورځې تېرې شوې دي. اوسني هوايي حالات او د موسم وړاندوينه ښايي چې د وچکالۍ وضعیت به نور هم خراب کړي.

هغه ځانګړې سیمې چې د معتدلې وچکالۍ سره مخ دي په لاندې ډول دي: پډیډن، شهید بینظیر آباد، دادو، د تهرپارکر، عمرکوټ، خیرپور، حیدرآباد، ټټه، بدین او کراچۍ په سند کښې؛ او ګوادر، کیچ، لسبیله، پنجګور او آواران په بلوچستان کښې شامل دي. په سند او بلوچستان کښې په نورو ضلعو او همدارنګه په پنجاب کښې په بهاولنګر، بهاولپور او رحیم یار خان کښې د لږې وچکالۍ اټکل کیږي.

د پاکستان ميټرولوجيکل ډيپارټمنټ د وچکالۍ د څارنې او ژر خبرتیا ملي مرکز (NDMC) په فعاله توګه وضعیت څاري. د ناڅاپي وچکالۍ احتمال هم شته چې د لږ ورښت او د تودوخې د لوړېدو له امله په چټکۍ سره وده کوي او دا په راتلونکو میاشتو کښې د اندېښنې وړ ده.

د ۲۰۲۴ کال د ستمبر له لومړۍ نېټې څخه د ۲۰۲۵ کال د مارچ تر ۲۱مې نېټې پورې ټول باران د معمول په پرتله ۴۰ فیصد کم و. چې سند تر ټولو زیات اغېزمن شوی دی (-۶۲ فیصد)

د تربیلا او منګلا بندونو کښې د اوبو کچه خورا ټیټه ده. چې دا وضعیت نور هم خرابوي. NDMC راپور ورکړی چې د مارچ له ۱۵مې تر ۲۱مې نېټې پورې تودوخه د اوسط په پرتله ۱-۷ درجې زیاته وه. چې له امله یې د خاورې رطوبت کم شوی او د اوبو غوښتنه زیاته شوې او په فصلونو یې منفي اغېزه کړې ده. له مارچ له ۲۴مې تر ۳۰مې نېټې پورې د هېواد په ډېرو برخو کښې وچه هوا اټکل شوې ده. خو په شمال کښې به ځینې استثناوې وي.