د پاکستان مرستیال وزیراعظم او خارجه وزیر اسحاق ډار د پنجشنبې په ورځ هند ته یو سخت چیلنج ورکړ او په کشمیر کښې په وروستي خونړي برید کښې د پاکستان په مبینه لاس لرلو ثبوت یې وغوښت.  وزیر دفاع خواجه اصف وویل چې هند په پاکستان کښې د ترهګریزو بریدونو پلان لري.

د ملي امنیت کمیټې (NSC) یوې لوړې کچې غونډې وروسته ډار وویل چې هند په مکرر ډول په پاکستان تورونه لګوي پرته له دې چې کوم ثبوت وړاندې کړي. هغه په مستقیم ډول هند ته چیلنج ورکړ چې د پهالګام په پیښه کښې د پاکستان د لاس لرلو هر ډول ثبوت له پاکستان او نړیوالې ټولنې سره شریک کړي.

په دې خبري غونډه کښې چې دفاع وزیر خواجه اصف د قانون وزیر اعظم نذیر تارړ، د اطلاعاتو وزیر عطاالله تارړ او لوی څارنوال منصور اعوان هم ګډون کړی و. ډار د ملي امنیت کمیټې پریکړې بیان کړې او ټینګار یې وکړ چې پاکستان د هند د څرګندونو په ځواب کښې متناسب غبرګون ښودلی دی.

ډار دا هم په ډاګه کړه چې د پاکستان استخباراتي ادارې په سرینگر کښې د څو بهرنیو اتباعو شتون څاري. چې هغه ادعا کوي د هند استخبارات یې ملاتړ کوي او هڅه کوي چې د لاس جوړ شوي چاودیدونکي توکي (IEDs) صادر کړي. هغه د هر ډول تیري په وړاندې د پاکستان د پوځي چمتووالي ټینګار وکړ. ډار وویل چي مونږ د دفاع لپاره چمتو یو. هغه خبرداری ورکړ چې د تیري هره هڅه به له سختو پایلو سره مخ شي.

دفاع وزیر خواجه اصف وویل چې پاکستان ته معلومات دي چې هند د بشپړې جګړې پرځای په پاکستان کښې د ترهګریزو بریدونو پلان لري. هغه زیاته کړه که چیرې دا ډول پیښه رامینځته شي. پاکستان به هند ته د پوزې له لارې تاوان ورکړي.

اصف د ترهګري په تور د هند د لومړي وزیر نریندرا مودي د امریکا د ویزې د ردیدو تیرې پیښې ته اشاره وکړه او دا یې د پاکستان د نړیوالې کچې د تروریزم په دوامداره غندنې سره پرتله کړه.

هغه د ترهګرۍ د قرباني په توګه د پاکستان پر دریځ ټینګار وکړ او په خیبر پښتونخوا او بلوچستان کښې یې روانو بریدونو ته اشاره وکړه او ادعا یې وکړه چې د تحریک طالبان پاکستان او بلوچستان لیبریشن آرمي په څیر د منع شویو وسله والو ډلو مشرانو ته په هند کښې پناه ورکړل شوي او ملاتړ کیږي. خواجه آصف دا هم ادعا وکړه چې شواهد په پاکستان کښې په ترهګریزو فعالیتونو کښې د هند لاسوهنې ته اشاره کوي. په ځانګړي توګه په بلوچستان کښې او له افغانستان څخه سرچینه اخلي.

پاکستان د هند په وړاندې یو لړ ځوابي تدابیر اعلان کړي او د اوبو هر ډول غصب یې د جګړې عمل بللی دی.