په خیبر پښتونخوا د بنو په ولسوالۍ کې د استخباراتي معلوماتو پر بنسټ دوه بریالي او کره هوايي بریدونه د یوې ناقانونه ډلې پر پټو مرکزونو شوي دي. دا مرکزونه د نرمي خېل په سیمه کې د هغو دولتي ښوونځیو په ودانیو کې جوړ شوي وو چې دوه کاله وړاندې تړل شوي وو. ویل کېږي چې د حافظ ګل بهادر ډلې پورې تړلو جنګیالیو په دې ځایونو کې د ځانمرګو بریدګرو د روزنې مرکزونه جوړ کړي وو.

چارواکي وایي چې په بریدونو کې شاوخوا دوه درجن سخت دریځي وژل شوي دي چې پکې یوولس ځانمرګي بریدګر هم شامل دي.

د نرمي خېل اوسېدونکو د “خراسان ډایري” خبري اژانس ته ویلي چې د بریدونو نه مخکې یې د ایوب سکول په شاوخوا کې بهرني کسان لیدلي وو. راپورونه څرګندوي چې له دغو بهرنیانو څخه اته تنه وژل شوي دي.

تر دې وړاندې، د یکشنبې په ورځ، په خیبر پښتونخوا د ډېره اسماعیل خان په ولسوالۍ کې د یوې مهمې امنیتي عملیات له امله د کالعدم تحریک طالبان پاکستان (TTP) دوه لوړپوړي قوماندانان وژل شوي دي. عملیات د درازندې د خواجه پيار په سیمه کې شوي وو.

د امنیتي سرچینو په وینا، په عملیاتو کې د TTP درې جنګیالي وژل شوي دي. یو تن ابودرده، چې حکیم هم بلل کېده، د پنجاب د مظفرګړ سیمې اوسېدونکی او په جنوبي پنجاب کې د TTP د فعالیتونو مسؤل و. نوموړی تازه په یوه ویډیو کې لیدل شوی و چې پکې یې د کالعدم تحریک لبیک پاکستان (TLP) غړي د TTP سره د یوځای کېدو بلنه ورکوله. بل وژل شوی کس اعجاز احمد، چې ابو دجانه هم پېژندل کېده، د پنجاب د تونسې اوسېدونکی و او د تازه شهرت موندلې ډلې تحریک طالبان کشمیر (TTK) سره یې اړیکې لرلې. د اسلام‌اباد سرچینې وايي چې ابو دجانه د حرکت الجهاد الاسلامي مشر او د ۳۱۳ بریګېډ قوماندان الیاس کشمیري سره هم تړاو درلود.

سرچینو په وینا، دواړه قوماندانان له خپلو کورنیو سره افغانستان ته تللي وو، او هماغلته په دې عملیاتو کې ووژل شول.