د فدرالي حکومت له خوا ورکړل شوې بُلټ پروف موټرې د خیبر پښتونخوا له وزیراعلي پرته له کومې تخنیکي معاینې د غیرقابل استعمال په توګه رد شوې او بېرته راستول شوې دي.

د خبرکده د سرچینو په وینا، د موټرو د معاینې لپاره ټاکل شوې تخنیکي کمیټه تراوسه خپل راپور نه دی جوړ کړی او نه هم کومه اندېښنه یې څرګنده کړې، خو بیا هم وزیراعلي خیبر پښتونخوا سهیل آفریدی ته دا باور ورکړل شوی چې دغه بُلټ پروف موټرې ناقصې دي. اوس په دې اړه په دوو پولیسو افسرانو شک کېږي چې ښايي د وزیراعلي سره د موټرو په اړه غلط معلومات شریک کړي وي.

د فدرالي حکومت له خوا خیبر پښتونخوا ته ورکړل شوې د ملګرو ملتونو ډالۍ شوې بُلټ پروف موټرې د وزیراعلي سهیل آفریدی له خوا پرته له تخنیکي راپور څخه ناقصې ګڼل شوې، چې په ملي کچه نوې بحثونه راپورته کړي دي.

سرچینې وايي، د خیبر پښتونخوا د پولیسو آی جی ذوالفقار حمید د کورنیو چارو وزارت ته د بُلټ پروف موټرو د ترلاسه کولو غوښتنه کړې وه. ورته ویل شوي و چې درې موټرې د ملګرو ملتونو له خوا ډالۍ شوې دي او د جاپان لخوا بُلټ پروف شوي دي، دوه نورې موټرې به ایف سي ته ورکړل شي. خو دا لا نه ده څرګنده چې وزیراعلي ته غلط معلومات څوک ورکړي، چې وروسته یې موټرې ناقصې ګڼلې او بېرته راستولې.

د خبرکده ځانګړې تحقیقاتو وروسته څرګنده شوه چې د دې ټولې پروسې په ترڅ کې د پولیسو یو لوړ پوړي افسر مهم رول لوبولی دی. هغه افسر د موټرو د تخنیکي نیمګړتیاوو رسمي یادونه کړې وه، چې وروسته پرېکړه وشوه چې موټرې بېرته واخلي.

خو یاد افسر دا یادونه د تخنیکي کمیټې د راپور وړاندې کړې وه، او همدې یادونې پر اساس وزیر اعلی سهیل آفریدی پرېکړه وکړه چې بُلټ پروف موټرې بېرته واستول شي.

پولیسو ویلي، تیر مالي کال کې ۱۰۵ موټرې جیپونه، ډبل او سینګل کیبن موټرې او APCs مختلفو ولسوالیو ته وېشلي شوي، او ۱۱ بُلټ پروف موټرې د استعمال نه وتلي دي.

د اداري چارو څانګې لپاره اړینې سرکاري پروټوکول موټرې هم نه شته. په ۲۰۱۰ کې امریکا صوبايي حکومت ته د B-6 کچې څلور لینډ کروزر موټرې ډالۍ کړې وې، چې اوس یوازې د چیف سیکرټر تر استعمال لاندې موټر فعاله ده، پاتې درې موټرې خرابې شوي او د ترمیم لپاره یې ډېر لګښت غواړي.

همدارنګه، په ۲۰۱۱ کې بُلټ پروف شوې ۱۱ لینډ روور جیپونه کې ۷ ناقابل استعمال شوي، پاتې ۴ موټرې ملاکنډ، کوهاټ، مردان او پېښور کې کمیشنرانو ته ورکړل شوې دي. د ۲۰۱۰ کال ټویوټا کرولا الټس موټرې کې یوه ناقابل استعمال شوې، پاتې پنځه لا هم مختلفو سرکاري افسرانو او ادارو لخوا استعمالیږي.

په ۲۰۱۴ کال کې صوبايي حکومت د ټویوټا فرنټیر موټرز پشاور څخه څلور V-8 بُلټ پروف موټرې د ۱۴ کروړه ۵۰ لکه روپیو په قیمت واخیستې، خو د تخنیکي نیمګړتیاوو له امله حکومت موټرې ترلاسه نه کړې او قضیه محکمې ته لاړه.

لس کاله وروسته، په ۲۰۲۴ کې د بریگیډیر (ر) مصدق عباسي په مشرۍ یو ۹ کسیزه کمیټه جوړه شوه، چې سپارښتنه یې وکړه چې د دې موټرو زاړه بُلټ پروف شیشې او ټایرونه بدل شي. کابینې دا پرېکړه منظوره کړه، خو د موټرو بنسټیزې نیمګړتیاوې لا هم موجودې دي.

د مالي قدرت د قانون ۲۰۱۸ مطابق، هیڅ سرکاري موټر له ۱۲ کالو یا ۳۱۵،۰۰۰ کیلومتره وروسته د استعمال نه بهر ګڼل کېږي، نو په دې اساس دا موټرې یو نیم کال وروسته ناقابل استعمال شي.

په ۲۰۲۱ کې صوبايي حکومت د وزیر اعلی لپاره د ایف بي آر له نیلامۍ څخه د ۱۰ کروړه روپیو په قیمت یوه BMW بُلټ پروف موټر واخیسته، چې تراوسه په استعمال کې ده. د قانون له مخې لوړ پوړو چارواکو او بهرنیو وفودو ته پروټوکول موټرې ورکول د اداري څانګې مسؤلیت دی، خو دا مهال څانګه یوازې ۱۰ موټرې د ۷۵ اړینې موټرو څخه استعمال ته چمتو لري.

سرچینې وايي، څو بُلټ پروف موټرې د قواعدو خلاف وزیرانو، مشیرو او ځانګړو مرستندویانو ته ورکړل شوې، چې د ۱۸۰۰ سی سی موټرو د استعمال اجازه لري. همدارنګه، یوه بُلټ پروف موټر د صوبايي اسمبلۍ غړي انور خان په اختیار کې ده، چې دا هم د قواعدو خلاف ده.

ضم شوي ضلعو او سویل خیبر پښتونخوا کې د امنیت نازک وضعیت سره سره، هلته اداره ته بُلټ پروف موټرې نه دي ورکړل شوي، حالانکه په تېر کې سوات او ملاکنډ ته ځانګړې موټرې د ګواښونو وروسته ورکړل شوې وې.

پولیس وايي، په ۲۰۲۴-۲۵ مالي کال کې ۷۵ نوې بُلټ پروف موټرې سینئر پولیس افسرانو او سیمه ییزو چارواکو ته ورکړل شوې، او د ترهګرۍ د خطرونو په نظر کې نیولو سره د پرمختللي تجهیزاتو او وسلو برابرول هم روان دي.

د فدرالي حکومت له خوا ورکړل شوې پنځه بُلټ پروف موټرې کې درې پولیسو ته او دوه ایف سي ته ځانګړې شوې وې، خو وزیر اعلی سهیل آفریدی وايي دا موټرې “زوړ ماډل” او “ناقابل استعمال” دي، چې پولیسو ته خطر پېښولی شي، خو تراوسه دا خبره هیڅ تخنیکي راپور نه دی تایید کړی.