د خیبر پښتونخوا د سوات په کبل تحصیل کې د ډډهړه په سیمه کې یو سیمه ییز سیاسي او ټولنیز شخصیت کونسلر شاه وزیر خان د نامعلومو چاودېدونکو موادو د چاودنې له امله سخت ټپي شوی دی. نوموړی د ملک سرباز خان زوی دی او عمر یې شاوخوا شپږوس کاله ښودل شوی دی. دا پېښه د جمعې په ورځ د غرمې شاوخوا دولس بجې رامنځته شوې ده.
د ځایي سرچینو په وینا، د چاودنې له رامنځته کېدو سره سم د کبل پولیس او ریسکیو ۱۱۲۲ سوات ته خبر ورکړل شو. د ریسکیو ۱۱۲۲ ویاند وایي چې د ډسټرکټ ایمرجنسي افسر رفیع الله مروت په لارښوونه طبي ټیم ژر د پېښې ځای ته ورسېد. ټیم پر ځای لومړنۍ طبي مرستې ورکړې او کونسلر شاه وزیر خان د نورو درملنو لپاره د کبل سول روغتون ته ولېږدوه. د ټپي کونسلر روغتیايي حالت اندېښمن بلل کېږي.
د پولیسو په وینا، د پېښې له خبرتیا سره سم ایس ایچ او حیات خان د پولیسو له یوې ډلې سره سیمې ته ورسېد او د پېښې معاینه یې وکړه. د لومړنیو پلټنو له مخې، دا چاودنه ښايي د پاتې شویو چاودېدونکو موادو یا کومې تخریبي کړنې پایله وي.
سرچینې زیاتوي چې پولیسو سیمه خوندي کړې ده او د شواهدو د لا دقیقې معاینې لپاره د فارنزیک ټیم غوښتنه شوې ده. تر دې دمه د پېښې په تړاو هېڅوک نه دي نیول شوي او پلټنې لا هم روانې دي.
