وزيراعظم شهباز شریف د چهارشنبې په ورځ وویل چې سعودي عربستان د هند او پاکستان ترمنځ د خبرو اترو احتمالي ځای کیدای شي. هغه زیاته کړه چې دا خبرې به د کشمیر، اوبو او ترهګرۍ په اړه وي.
شهباز دا څرګندونې د چهارشنبې په ورځ په وزیراعظم هاوس کښې خبریالانو ته کولې.
کله چې ترې وپوښتل شول چې ایا چین د پاکستان او هند ترمنځ د خبرو اترو ځای کیدای شي. نو وزیراعظم وویل چې هند به هېڅکله دا ډول وړاندیز ونه مني. هغه زیاته کړه چې سعودي عربستان به یو احتمالي ځای وي.
هغه دا هم وویل چې خبرې اترې به یوازې په ترهګرۍ تمرکز ونه کړي. لکه څنګه چې هند یې ادعا کوي. بلکې کشمیر، اوبه او سوداګري به هم پکې شامل وي.
شهباز دا هم وویل چې د پوځ د مشر عاصم منیر فیلډ مارشل ته وده ورکول د هغه مفکوره وه. هغه دا هم زیاته کړه چې د دې پریکړې کولو دمخه یې له نواز شریف سره مشوره کړې وه.
وزیراعظم دا هم وویل چې د وروستي بحران وروسته د پاکستان او هند ترمنځ کړکیچ کم شوی دی. هغه زیاته کړه چې که خبرې اترې کیږي. نو د دواړو هیوادونو د ملي امنیت سلاکارانو ترمنځ به ترسره کیږي.
په دې وروستیو کښې د امریکا په منځګړیتوب د پاکستان او هند ترمنځ اوربند وشو. وروسته له هغه چې پاکستان د هند پر ښارونو د بریدونو په ځواب کښې عملیات بنیانم مرسوس پیل کړل. پاکستان شپږ هندي الوتکې ویشتلي او په هند کښې یې ۲۶ پوځي ځایونه په نښه کړي وو.
