د امریکا مرکزي قومندانۍد سمندري نشه يي توکو ضد یوې سترې عملیاتې په ترڅ کې، د پاکستان بحري ځواکونو بېړۍ (PNS یرموک)، چې د سعودي عربستان تر مشرۍ لاندې د ګډو سمندري ځواکونو (Combined Maritime Forces – CMF) د ګډ ټاسک ځواک (CTF 150) تر قوماندې لاندې فعالیت کوي، د “ال مسمک” په نوم متمرکز عملیاتو پر مهال د عربي سمندر په اوبو کې له ۹۷۲ میلیونه امریکایي ډالرو څخه زیات ارزښت لرونکي نشه يي توکي ونیول — چې دا د یوې بې‌سارې لاسته راوړنې په توګه ګڼل کېږي.

په تېرو ۴۸ ساعتونو کې، PNS یرموک دوې مشکوکې، بې نښانه او بې تابعیته سیمه‌ییزې بېړۍ (Dhows) ودرولې او د پلټنې عملیات یې پرې ترسره کړل.لومړی عملیات د اکتوبر په ۱۸مه ترسره شو، چې په نتیجه کې یې له دوو ټنو څخه زیات کرسټل مېت (آیس) ونیول شول، چې ارزښت یې شاوخوا ۸۲۲ میلیونه ډالره و.په دوهم عملیات کې، ۳۵۰ کیلوګرامه آیس او ۵۰ کیلوګرامه کوکاین ونیول شول، چې د آیس ارزښت ۱۴۰ میلیونه ډالره او د کوکاین ارزښت ۱۰ میلیونه ډالره ښودل شوی دی.

ټولې نیول شوې نشه يي توکي وازمویل شول او وروسته په خوندي توګه په سمندر کې له منځه یووړل شول.د CTF 150 قوماندان، د سعودي شاهي بحري ځواکونو کموډور فهد الجویّد وویل:> “PNS یرموک د CMF لپاره د نشه يي توکو له تر ټولو بریالیو نیونو څخه یوه ترسره کړې ده — دا زموږ د څو مليتي بحري ځواکونو د مهارت او ګډ کار څرګند ثبوت دی.

”د اکتوبر په ۱۶مه پیل شوی عملیات “ال مسمک” د سیمه‌ییز امنیت او سمندري خوندیتوب د پیاوړتیا لپاره د سعودي عربستان، پاکستان، فرانسه، هسپانیا او امریکا د بحري ځواکونو ترمنځ د بې‌ساري همغږۍ څرګندونه کوي.CTF 150 د هند سمندر، عربي سمندر او د عمان خلیج په اوږدو کې د وسلو، نشه يي توکو او نورو ناقانونه توکو د قاچاق د مخنیوي لپاره خپلې هڅې روانې ساتي، څو د نړۍ له تر ټولو مهمو سمندري لارو څخه یوه خوندي وساتي.