د قطر په دوحه کې د پاکستان او افغانستان ترمنځ د اوربند او دایمي سولې تړون سعودي عرب هرکلی وکړو.
د سعودي عرب د بهرنیو چارو وزارت د یوې اعلامیې له لارې دغه فیصله د سیمې د ثبات لپاره یو مهم ګام بللی دی.
سعودي عرب د قطر په پلازمېنه دوحه کې د ترسره شوو خبرو اترو پر مهال د اسلامي جمهوریت پاکستان او افغانستان تر منځ د اوربند پر هوکړې او د دایمي سولې او ثبات لپاره د میکانیزم پر جوړېدو خوښي څرګنده کړې او هرکلی یې کړی دی.
د سعودي عرب د بهرنیو چارو وزارت د ۲۰۲۵م کال د اکتوبر پر ۱۹مه، اتوار (یکشنبې) په خپره کړې اعلامیه کې ویلي. چې ریاض د پاکستان او افغانستان تر منځ د دایمي سولې او ثبات د ټینګولو لپاره شوې دغه هوکړه یو پرمختګ ګڼي.
اعلامیه وایي، سعودي عرب په سیمه ییزه او نړیواله کچه د سولې او ثبات د پرمختګ لپاره له ټولو هڅو څخه پوره ملاتړ کوي. چې مقصد یې د دواړو وروڼو ملتونو، پاکستان او افغانستان لپاره ثبات او سوکالي یقیني کول دي.
د بهرنیو چارو وزارت هیله څرګنده کړې چې دا مثبت ګام به د دواړو هېوادونو ترمنځ د سرحدي کړکیچونو د پای ته رسېدو لامل شي. سعودي عرب په دې برخه کې د قطر او ترکیې هڅې او رغنده ډیپلوماټیک رول هم ستایلی او قدرداني یې کړې ده.
دا اوربند او تړون په داسې حال کې وشو چې د اکتوبر پر ۱۱مه د دواړو ګاونډیو هېوادونو تر منځ سختې سرحدي نښتې پیل شوې وې. د پاکستان د پوځ د عامه اړیکو څانګې (آی ایس پي آر) په وینا، په دغو نښتو کې ۲۳ پاکستانی پوځیان وژل شوي او تر ۲۰۰ ډېر طالبان او اړوند وسله وال وژل شوي وو.
افغانستان ادعا کړې وه چې دا برید یې “ځوابي اقدام” و او پر پاکستان یې د هوایي بریدونو تور پورې کړی و. پاکستان دا تور نه تایید کړی او نه یې رد کړی.
د یادونې وړ ده. چې دا اوربند په داسې وخت کې اعلان شو کله چې پاکستان د اکتوبر پر ۱۷مه هم په افغانستان کې د ترهګرو مرکزونه په نښه کړي وو.
د پاکستان لپاره یوه لویه اندېښنه دا ده چې د ۲۰۲۱م کال د طالبانو له واکمنېدو وروسته هم د تحریک طالبان پاکستان (ټي ټي پي) ډلې د افغان خاورې کارول نه دي بند شوي او پر دې اساس په خیبر پښتونخوا او بلوچستان کې د ترهګریزو فعالیتونو زیاتوالی راغلی دی. کابل بیا په وار وار دا ډول تورونه ردوي.
