نن په کابل کښې د افغانستان د بهرنیو چارو وزیر مولوي امیر خان متقي او د پاکستان د لومړي وزیر مرستیال او د بهرنیو چارو وزیر محمد اسحاق ډار سره ولیدل. په دې ناسته کښې دواړو لورو د خپلو هېوادونو ترمنځ پر سیاسي، اقتصادي، سوداګریزو، ترانزیتي او نورو مهمو موضوعاتو خبرې وکړې.
د ناستې په پیل کښې مولوي امیر خان متقي وویل چې اسلامي امارت غواړي له پاکستان او ټولې نړۍ سره پر متقابل احترام ولاړې ښې اړیکې ولري. هغه زیاته کړه چې افغانستان لیواله دی چې له پاکستان سره سوداګري، ترانزیت او ګډې پروژې نورې هم پراخې کړي. متقي صاحب پر پاکستاني پلاوي ټینګار وکړ چې د ستونزو د هواري او اسانتیاوو د رامنځته کولو لپاره باید عملي ګامونه پورته شي. د خبرو اترو یوه بله مهمه برخه په پاکستان کښې د افغان کډوالو وضعیت و. مولوي متقي له پاکستاني چارواکو وغوښتل چې هلته د مېشتو او راتلونکو افغانانو د حقونو د خوندیتوب لپاره اقدام وکړي او د هغوی د حقونو له ضایع کېدو څخه مخنیوی وکړي.
له بلې خوا د پاکستان د بهرنیو چارو وزیر اسحاق ډار وویل چې د دوی حکومت له افغانستان سره دوه اړخیزې سوداګرۍ او ترانزیت ته د لا زیاتې پراختیا هوډ لري او په دې برخه کښې یې د مرستې ژمنه وکړه.
هغه زیاته کړه چې په امنیتي برخه کښې په ځانګړې توګه د ترهګرۍ پر وړاندې مبارزه کښې پرمختګ لا هم ورو دی. نوموړي په پاکستان کښې دننه د ترهګریزو بریدونو د زیاتېدو په اړه چې له افغانستان څخه د فعالو ډلو له خوا ترسره کېږي. هغه په دې خبره رڼا واچوله او د افغانستان له چارواکو یې وغوښتل چې د پاکستاني طالبانو (TTP) او بلوچستان لبریشن آرمي (BLA)/مجید برید په څېر ډلو پر وړاندې مشخص او د تایید وړ ګامونه پورته کړي.
د دواړو هېوادونو وزیرانو د ۲۰۲۵ کال د می په ۲۱ نېټه په پکن کښې د درې اړخیزې غونډې پر اساس، له چارواکو څخه سفیرانو ته د ډیپلوماټیکو استازو د کچې د لوړولو هرکلی وکړ. دوی د سوداګرۍ او ترانزیت په برخو کښې د اړیکو د پیاوړي کېدو ستاینه وکړه. د افغانستان سرپرست خارجه وزیر بیا ټینګار وکړ چې د افغانستان خاوره به د پاکستان او یا د نورو هېوادونو پر وړاندې د هېڅ ترهګریزې ډلې له خوا استعمال نه شي.
د پاکستان مرستیال وزیراعظم او خارجه وزیر له افغانستاني چارواکو څخه د هغوی د مېلمه پالنې له امله مننه وکړه او د شپږمې درې اړخیزې خبرو اترو د بریالي کوربه توب مبارکي یې ورته وویله.
