د کلونو جګړو او ترهګرۍ وروسته کله چې د خیبر پښتونخوا خلک د سولې او ثبات هیله لري نو د نښه ییزو وژنو نوې څپې د خلکو په زړونو کې وېره او وحشت پیدا کړی دی.
وسله وال په سیمه کې هغه خلک په نښه کوي چې د دوی خلاف خبرې کوي یا د دوی په لاره کې خنډ جوړیږي.
د اتوار (یکشنبې) په ورځ په صوابۍ ضلعې کې ۴۵ کلن عظیم داد په کالا بت سیمه کې په ډزو وژل شوی.
ریسکیو ۱۱۲۲ چارواکو وویل چې عظیم داد خان د نامعلومو کسانو لخوا په نښه شوی. چې په ځای یې ساه ورکړه او مړی یې د پوسټ مارټم لپاره د تحصیل مرکز روغتون ته وړل شوی.
لومړني راپورونه وایي چې د برید لامل روښانه نه و. خو څو ساعته وروسته تحریک طالبان پاکستان یا “الخوارج” ډلې د پېښې مسوولیت ومانه او عظیم داد یې د پاکستاني پوځ جاسوس وباله. دوی تور ولګاوه چې عظیم داد په ۲۰۱۶ کال کې د دوی د دوو ملګرو، کاشف او مدثر په وژنه کې لاس لرلو.
د دې پېښې وروسته په صوابۍ کې خلکو وېره او وحشت خپور شوی او ځايي اوسیدونکي وایي چې دا یو هدفمند عمل دی. پولیس وایي چې د پېښې په اړه پلټنې روانې دي.
په صوابۍ ضلعې کې دا پېښه د بلې لوړې کچې نښه ییزې وژنې نه څو ورځې وروسته رامنځته شوې ده. په دې پېښه کې د عوامي نیشنل ګوند (اے این پي) یو لوړپوړی مشر د یونین کونسل پخوانی ناظم او د سیمه ییزې سولې کمیټې مشر جعفر خان د سوات د کبل تحصیل د کلکلائي سیمې کې د خپل کور مخې ته په ډزو وژل شوی و. د کالعدم تحریک طالبان پاکستان (ټي ټي پي) د دې برید مسوولیت ومانه. چې دا څرګندوي چې دوی د سوله ایزو فعالانو او سیاسي فعالانو د خاموشولو خپله مبارزه روانه ساتلې ده.
د سیمې د خلکو لپاره دا وژنې پخواني ټپونه تازه کوي. جعفر خان د یو داسې کس په توګه یاد ساتل کیږي چې د ترهګرۍ پر وړاندې په داسې وخت کې ودرېد چې ډیر کم خلک یې دا زړورتیا لرله. د کلکلائي یوې غمجنې مشرې د جعفر خان په وژنه وویل چې هغه مونږ ته په دې تیاره ورځو کې زړورتیا راکړه.
کارپوهان خبرداری ورکوي چې دا ډول بریدونه د وسله والو د یوې پراخې تګلارې برخه ده. چې مقصد یې د ټولنې وېره وېرل، مخالفت ختمول او په صوابۍ، سوات، باجوړ او شمالي وزیرستان په ګډون په څو ضلعو کې خپل واک بیا ټینګول دي. چارواکي هم مني چې خطر ریښتینی دی. ځکه چې وسله وال د پولې هاخوا پټنځایونو او محلي شبکو څخه د بریدونو لپاره په هر وخت کې کار اخلي.
