د خیبر پښتونخوا حکومت د صوبې د هغو اقلیتي کورنیو سره د مالي مرستې لپاره ګامونه پورته کړي دي چې د ترهګرۍ له امله اغېزمن شوي دي.
د اوقافو او مذهبي چارو محکمې د ۲۰۱۳ کال راهیسې د ټولو اغېزمنو کورنیو معلوماتو راټولولو لپاره ټولو مرستیال کمشنرانو (ډپټي کمشنرز) ته رسمي خط استولی دی.
د اقلیتي چارو فوکل پرسن وزیر زاده ویلي چې د دې ګام مقصد د ترهګرۍ ښکار اقلیتي کورنیو ته د هغوی حق ورکول دي. په خط کې مرستیال کمشنرانو ته ویل شوي چې په لسو ورځو کې دننه مکمل معلومات ورکړي.
د دې معلوماتو په اساس به د ستمبر په پای کې د خیبر پښتونخوا د وزیراعلیٰ په مشرۍ یوه لوړه کچه غونډه جوړه شي. په دې غونډه کې به د اغېزمنو کورنیو لپاره د مالي مرستې په اړه پرېکړې وشي. د دې هڅې تمرکز په خاص ډول د پېښور د آل سینټ چرچ برید پر شهیدانو او اغېزمنو کسانو دی.
وزیر زاده زیاته کړه چې د ترهګرۍ د ښکار شویو خلکو بیا رغونې لپاره قانون په ۲۰۲۰ کال کې منظور شوی وو او مقررات یې په ۲۰۲۱ کال کې نافذ شوي وو. خو له بده مرغه د حکومت بدلېدو او اوږدې نګرانې دورې په ترڅ کې دا بهیر درېدلی و.
اوسني حکومت د دې بهیر د بیا پیلولو سره اغېزمنو کورنیو ته د مرستې رسولو جدي هڅه پیل کړې ده. دا ګام د اقلیتي ټولنې د حقونو ساتنې لپاره د حکومت ژمنتیا ښیي.
