د پاکستان وزیراعظم محمد شهباز شریف د ګل (دوشنبې) په سهار د مصر شرم الشیخ ښار ته ورسېدو. چیرته چې هغه د تاریخي غزې سولې پلان د لاسلیک په غونډه کې ګډون کوي. هغه په دې تړون د خبرو پر مهال وویل چې دا په منځني ختیځ کې د اوږدمهاله سولې په لور یو مهم ګام دی.
وزیراعظم په یوه بیان کې وویل: “الحمدلله، نن سهار شرم الشیخ ته ورسېدم چې د غزې سولې پلان د لاسلیک په تاریخي مراسمو کې ګډون وکړم، کوم چې په منځني ختیځ کې د اوږدمهاله سولې په لور یو مهم ګام دی.”
هغه د دې کانفرنس په ګډه کوربه توب د ولسمشر السیسي او ولسمشر ټرمپ څخه مننه وکړه. وزیراعظم وویل چې د ولسمشر ټرمپ د شاندارې مشرتابه او قوي ارادې پرته دا شیبه لیدل ممکن نه و. شهباز شریف زیاته کړه چې د بې ځایه وژنو او تباهۍ د ختمولو لپاره د سولې په لور د هغه هوډ ته اړتیا وه.
وزیراعظم د دې تړون په اهمیت ټینګار وکړو او ویې ویل چې نننۍ غونډه د نسل وژنې د یو باب پای ته رسیدل په ګوته کوي. هغه وویل چې نړیواله ټولنه باید دا یقیني کړي چې دا جرم بیا په هیڅ ځای کې تکرار نه شي.
شهباز شریف د فلسطین د کیس سره خپله بې بېلګه ژمنتیا بیا تکرار کړه او ویې ویل: “زړور او په همت فلسطینیان په یو آزاد فلسطین کې د ژوند کولو حق لري. چې سرحدونه یې د ۱۹۶۷ز کال څخه مخکې وي او قدس الشریف یې پلازمینه وي.”
واضح دي وي چې وزیراعظم شهباز شریف دا سفر د امریکا ولسمشر ډونلډ ټرمپ او مصري ولسمشر عبدالفتاح السیسي په خاص بلنه کوي. دا سوله ایزه سرمشریزه په سیمه کې د سولې راوستلو د نړیوالو هڅو یوه مهمه برخه ده.
د دې سرمشریزې مشري به ولسمشر ډونلډ ټرمپ او د هغه مصري سیال ولسمشر سیسي په ګډه کوي، او دا به د سره سمندر په تفریحي ځای شرم الشیخ کې ترسره شي. په دې کې د ۲۰ څخه زیاتو هیوادونو مشران، لکه د ملګرو ملتونو مشر، د برتانیې وزیراعظم کیر سټارمر، د فرانسې ولسمشر ایمانویل میکرون، د ترکیې ولسمشر رجب طیب اردوغان او د اردن پاچا عبدالله دوهم ګډون کوي. دوی به هڅه وکړي چې په غزې تړانګه کې جنګ پای ته ورسوي، په منځني ختیځ کې د سولې او ثبات لپاره هڅې زیاتې کړي او د سیمه ایز امنیت یو نوی دور پیل کړي.
خو، اسرائیل او فلسطیني ډله حماس به په دې سرمشریزه کې په مستقیم ډول شامل نه وي. حماس ویلي چې دوی به د پخوانیو خبرو په څیر د خپلو قطري او مصري منځګړو له لارې خپل کار ته دوام ورکوي.
