د پاکستان تحریک انصاف (پي ټي آي) کارکن سهیل خان اپریدي ۹۰ (نوي) رایې ترلاسه کړې او د خیبر پښتونخوا نوی وزیر اعلی وټاکل شو.
د بریا لپاره ورته یوازې ۷۳ (درې اویا) رایو ته ضرورت و، خو نوموړي په ښکاره اکثریت سره بریالیتوب ترلاسه کړو.
د سهیل اپریدي په مقابل کې د جمعیت علمای اسلام (ف) مولانا لطف الرحمن، د پیپلز پارټۍ ارباب زرک او د نون لیګ سردار شاه جهان په میدان کې ولاړ وو.
د ګل (دوشنبې) په ورځ د خیبر پښتونخوا د اسمبلۍ غونډه د سپیکر بابر سلیم سواتي په مشرۍ وشوه. چې ډېره جنجالي او له شخړو ډکه وه.
د نوي وزیر اعلی د ټاکلو په جریان کې د پخواني وزیر اعلی علي امین ګنډاپور، د اسمبلۍ غړو او اپوزیشن ترمنځ توده شخړه او ګرمې خبرې وشوې.
علي امین ګنډاپور ایوان ته وینا وکړه او سهیل اپریدي ته یې له مخکې مبارکي ورکړه.
بل پلو، اپوزیشن د ټاکنو دا پروسه غیر آئیني وبلله او د احتجاج په ډول یی له ایوانه واک آوټ (ووتل) وکړو.
د اپوزیشن مشر ډاکټر عباد الله پوښتنه وکړه چې که د علي امین ګنډاپور کارکردګي ښه وه، نو ولې لیرې کړای شو؟
نوموړي وویل چې د یوه موجوده وزیر اعلی په شتون کې د نوي وزیر اعلی ټاکنه غیر آئیني ده.
د خیبر پښتونخوا ګورنر فیصل کریم کنډي د علي امین ګنډاپور استعفا د لاسليکونو د توپیر په بنیاد بیرته ورواستوله او نوموړی یې د اکتوبر په ۱۵مه نیټه ګورنر هاوس ته وربللی دی.
خو علي امین ګنډاپور پر ټولنیزو رسنیو ویلي چې په دواړو استعفاوو یې خپل اصلي لاسلیکونه شته دي.
ځینې سرچینې وايي چې یو شمېر کسان پلان لري چې د نوي وزیر اعلی د ټاکلو پر ضد عدالت ته ولاړ شي، ځکه چې یو وزیر اعلی لا شتون لري.
پي ټي آي د ټاکنیزې همکارۍ لپاره له مرکزي وزیر امیر مقام او د عوامي نېشنل پارټۍ (اې این پي) له مشرتابه سره هم لیدنې کړې دي.
ګورنر کنډي باور ورکړی چې د استعفا منظوري به د آئین او قانون مطابق کیږي.
