د ۲۰۲۵ کال د جولای په ۸ مه د سه شنبې په ورځ د چین د خلکو د آزادۍ پوځ هوایي ځواک مشر لېفټننټ جنرل وانګ ګنګ د یوه پلاوي په مشرۍ د پاکستان هوایي ځواک له مشر ایر چیف مارشل ظهیر احمد بابر سدھو سره وکتل. په دې کتنه کښې وانګ ګنګ د هند پر وړاندې په جګړه کښې د پاکستان هوایي ځواک د عملیاتي چمتووالي او فعالیت ستاینه وکړه. چینایي هوایي مشر د روزنې او ټیکنالوژۍ په برخه کښې د همکاریو د پراختیا په اړه هم خبرې وکړې.

د آيي ایس پي آر  له مخې د چین د خلکو د آزادۍ پوځ هوایي ځواک د لوی درستیز لېفټننټ جنرل وانګ ګنګ په مشرۍ یوه لوړ پوړې دفاعي پلاوي د اسلام آباد په هوایي مرکز کښې د پاکستان هوایي ځواک له مشر ایر چیف مارشل ظهیر احمد بابر سدھو سره وکتل. په دې کتنه کښې د متقابلو ګټو د سیمې د امنیت وضعیت او په ځانګړي توګه د هوایي ځواک او عملیاتي همغږۍ په برخه کښې د دوه اړخیزو همکاریو د پراختیا په اړه خبرې وشوې.

د هوایي ځواک مشر میلمنو ته ښه راغلاست ووایه او ویې ویل چې پاکستان او چین تاریخي او اوږدمهاله اړیکې لري چې د متقابل باور، ستراتیژیکې همغږۍ او د سیمې د سولې او ثبات لپاره د ګډو هیلو پر بنسټ ولاړې دي. لېفټننټ جنرل وانګ ګنګ ته د پاکستان هوایي ځواک د عصري جوړښت، ستراتیژیکو نوښتونو او د عملیاتي اصولو د پراختیا په اړه هر اړخیزه معلومات ورکړل شول. د هوایي ځواک مشر هم د دواړو هوایي ځواکونو ترمنځ پر قوي دوستۍ ټینګار وکړ او د روزنې، ټیکنالوژۍ او عملیاتي برخو کښې یې د همکاریو د پراختیا لپاره د پاکستان هوایي ځواک پر ژمنې بیا ټینګار وکړ.

جنرل وانګ ګنګ د پاکستان هوایي ځواک د لوړ عملیاتي چمتووالي او پرمختللو وړتیاوو ژوره ستاینه وکړه. هغه په ځانګړي توګه د پاکستان هوایي ځواک له ملټي ډومین اپریشن (Multi-Domain Operations) له بې سیمه ادغام څخه ډېر متاثره شو او دا یې د عصري هوایي جګړې یوه ځانګړنه وبلله. هغه د څو ډومین عملیاتو په برخه کښې د پاکستان هوایي ځواک له جګړه ییزو تجربو څخه د زده کړې لپاره د چین د خلکو د آزادۍ پوځ هوایي ځواک لیوالتیا څرګنده کړه. د پاکستان هوایي ځواک د مشرتابه د مسلکي پوهې او ستراتیژیک بصیرت په ستاینه، میلمه پلاوي د هند سره په وروستۍ جګړه کښې د پاکستان هوایي ځواک بیلګې پر فعالیت ډېره ستاینه وکړه. هغه د هوایي ځواک د مشر تر قوي مشرۍ لاندې د پاکستان هوایي ځواک پایلټانو لخوا ورکړل شوي پریکړه کونکي او اندازه شوي غبرګون وستایه او دا یې د بې دلیله تیری په وړاندې د دقت، نظم او زړورتیا یو درسي مثال وباله.

دا کتنه د پاکستان او چین د ګډ عزم ثبوت دی چې د ژورو همکاریو او نوښت پر بنسټ د خپلو اوږدمهاله ستراتیژیکو همکاریو ته وده ورکړي.