د ترهګرۍ سره د مبارزې لپاره د پاکستان حکومت نوي پلان په دریو برخو کښې جوړ شوی. پوځي عملیات، د قوانینو سختول او یو ملي پلان جوړول هم د دی برخه ده.
دا تګلاره د وزیراعظم شهباز شریف په مشرۍ د ریاست سختولو کمیټې په غونډه کښې تصویب شوه. د پوځ لوی درستیز فیلډ مارشل سید عاصم منیر هم په دې غونډه کښې و. د دې پلان هدف دا دی چې د ۲۰۱۴ کال پېښور سکول برید وروسته جوړ شوي ملي پلان ته لا وده ورکړي.
د ډان ورځپاڼې د راپور له مخې په دې پلان کښې د ترهګرو ډلو پر ضد هدفمند پوځي عملیات شامل دي.
چې په دوی کښې تحریک طالبان پاکستان (TTP) هم دی. چې په رسمي توګه فتنه الخوارج بلل کیږي.
په دې پلان کښې د موجوده قوانینو پیاوړتیا او د سخت دریځو نظریاتو سره د مقابلې لپاره د ملي خبرو اترو ته وده ورکول هم شامل دي.
حکومت غواړي چې د ټولنې ټولې برخې په دې هڅو کښې شریکې کړي. وزیراعظم شریف د ځمکنیو عملیاتو، قانوني اصلاحاتو او عامه پوهاوي په ګډون د څو اړخیزې تګلارې پر اهمیت ټینګار وکړ.
هغه د دې پلان د سپارښتنو د پلي کولو لپاره د مرکزي او صوبايي حکومتونو ترمنځ د اغېزمنې همغږۍ پر اړتیا ټینګار وکړ.
وزیراعظم د ترهګرۍ او قاچاق سره په مبارزه کښې د امنیتي او قانون پلي کوونکو ځواکونو هڅې هم وستایلې.
په دې غونډه کښې د افغان کډوالو د ستنولو په اړه هم خبرې وشوې او پر دې پروسې یې د چټکتیا پرېکړه وکړه. ګډونوالو یو ځل بیا وویل چې هدف یې یو داسې خوندي او باثباته چاپېریال رامنځته کول دي چې نړیواله پانګونه راجلب کړي.
