د ملګرو ملتونو امنیت شورا مشري پاکستان ته وسپارل شوه. پاکستان د ۲۰۲۵ کال د جولای په لومړۍ نېټه د ملګرو ملتونو د امنیت شورا مشري په غاړه واخیسته. چې د نړیوال بې ثباتۍ په اوسني وخت کښې یې یو مهم رول ترلاسه کړ.
دا د ۱۵ کسیزې شورا غړیتوب کښې د پاکستان اتمه دوره او له ۲۰۱۳ کال راهیسې یې لومړنۍ مشري ده. دغه هېواد د ۲۰۲۵ کال په جنورۍ کښې د دوو کلونو لپاره د غیر دایمي غړیتوب دوره پیل کړه او تر ۲۰۲۶ کال پورې به دوام وکړي.
ملګرو ملتونو ته د پاکستان دایمي استازي سفیر عاصم افتخار احمد د نړیوالې ټولنې پر وړاندې پرتو ننګونو ومنلې. چې پکې د شخړو زیاتوالی، پیچلي جیوپولیټیکل بدلونونه او د څو اړخیزو بنسټونو د اغیزمنتیا په اړه مخ پر ودې شکونه شامل دي.
هغه د سولې له لارې د شخړو حل او ډیپلوماسۍ ته د پاکستان ژمنتیا ته اشاره وکړه او ژمنه یې وکړه چې د خپلې دورې په اوږدو کښې به یو اصولي او متوازن چلند ولري.
که څه هم میاشتنۍ دوره ایزه مشري اجراییوي واک نه لري. خو د شورا پر ایجنډا او ټولیزه فضا د پام وړ اغیز لري. دا په ځانګړې توګه مهم دی ځکه چې د ملګرو ملتونو امنیت شورا د غزې او یوکراین په څیر پر مهمو مسلو باندې په ټپه ولاړه بلل کیږي.
په څو اړخیزو میکانیزمونو باندې د نړیوال باور کمیدو سره د پاکستان مشرتابه به له نږدې وڅارل شي. سفیر احمد ژمنه وکړه چې شفافیت، ټولشمولیت او ځواب ویونکي توب ته به وده ورکړي او د ملګرو ملتونو د منشور او نړیوالو تمو سره سم به د وخت په اوږدو کښې د ډله ایز اقدام لپاره د شورا له نورو غړو سره په ګډه کار وکړي.
