در ولایت مانسهرهٔ خیبرپختونخوا، افراد مسلح ناشناس بر موتر گشت پولیس فیر کردند که در نتیجهٔ آن چهار سرباز پولیس زخمی شدند. منابع محلی می‌گویند این رویداد در نزدیکی پوستهٔ پولیس «گیٹی داس» رخ داده است.
پولیس اعلام کرده که موتر پوستهٔ پولیس گیٹی داس در حال اجرای گشت معمولی بود که در یک پیچ، افراد مسلح ناشناس ناگهان بر آنان آتش گشودند. پولیس در پاسخ تیراندازی کرد، اما مهاجمان با استفاده از تاریکی شب موفق به فرار شدند. به گفتهٔ پولیس، چهار پولیس در این تیراندازی زخمی شده‌اند که فوری به شفاخانه انتقال یافته‌اند. مقامات پولیس تأیید کرده‌اند که وضعیت صحی زخمیان باثبات است و خطری آنان را تهدید نمی‌کند.
پس از رویداد، شفیع‌الله گنداپور، آمر پولیس ولایت مانسهره، همراه با دی‌اس‌پی پارس و ایس‌اچ‌او ناران به محل حادثه رفتند. آنان با شمار زیادی از نیروهای پولیس منطقه را محاصره کرده و عملیات جست‌وجو را آغاز نمودند. همچنان پولیس چلاس نیز در جریان قرار گرفته و ساحه مسدود گردیده است.
آمر پولیس مانسهره گفته است تا زمانی که عاملان این حمله بازداشت و به قانون سپرده نشوند، عملیات ادامه خواهد داشت.
