وزیراعظم محمد شہباز شریف نے بھارتی جارحیت کا منہ توڑ جواب دینے پر مسلح افواج کو زبردست خراج تحسین پیش کیا ہے۔ وزیراعظم نے کہا کہ مسلح افواج کی اس کارروائی سے قوم کا وقار بلند ہوا ہے۔

بدھ کے روز قومی اسمبلی سے خطاب کرتے ہوئے شہباز شریف نے کہا کہ تقریباً 80 بھارتی طیاروں نے پاکستان پر حملے میں حصہ لیا لیکن انہیں پاکستان میں داخل ہونے کی اجازت نہیں دی گئی۔ انہوں نے کہا کہ پاکستان پر حملہ کرنے کے فوراً بعد کم از کم پانچ بھارتی طیارے مار گرائے گئے۔

وزیراعظم شہباز شریف نے کہا کہ چند روز قبل بھارتی طیارے جنگی فارمیشن میں اڑے تھے، مگر پاکستان ائیر فورس نے ان کی مواصلات کو جام کر دیا جس کی وجہ سے وہ واپس جانے پر مجبور ہوئے۔

شہباز شریف نے ارکان پارلیمنٹ سے مخاطب ہو کر کہا کہ تمام جماعتوں کو دنیا کے سامنے یہ ظاہر کرنا چاہیے کہ پورا ملک اپنی خودمختاری کے تحفظ کے لیے متحد ہے۔

شہباز شریف نے مزید کہا کہ جعفر ایکسپریس حملے کی مذمت کرنے کے بجائے بھارت نے اس واقعے کا مذاق اڑایا، اس واقعے کی تاریخ بھی مذمت کرے گی۔

وزیراعظم نے مزید کہا کہ انہوں نے پہلگام حملے کی شفاف تحقیقات کے لیے ایک بین الاقوامی کمیشن بنانے کی پیشکش کی تھی۔ انہوں نے افسوس کا اظہار کیا کہ بھارت نے نہ صرف اس پیشکش کا کوئی جواب نہیں دیا بلکہ اس غیر ملکی سفارت کار کو ڈیمارش جاری کیا جس نے اس کا مشورہ دیا تھا۔

انہوں نے خطاب میں کہا کہ قومی اسمبلی ایک قرارداد کے ساتھ ملک کی افواج کو خراج تحسین پیش کرے گی۔