منگل کے روز بلوچستان کے علاقے مچھ میں کالعدم بلوچستان لبریشن آرمی کے حملے میں پاک فوج کے سات جوان شہید ہوگئے۔

پاک فوج کے شعبہ تعلقات عامہ (آئی ایس پی آر) کے مطابق بی ایل اے نے ضلع کچ کے علاقے مچھ میں ایک سیکیورٹی فورسز کی گاڑی کو دیسی ساختہ بم سے نشانہ بنایا۔ اس بیان میں آئی ایس پی آر نے بی ایل اے کو پہلی بار بھارت کی پراکسی قرار دیا ہے۔

اس حالیہ حملے کے نتیجے میں سات فوجی شہید ہوگئے ہیں۔ آئی ایس پی آر نے شہداء کی شناخت حوالدار عمر فاروق ( عمر 42 سال، کراچی کے رہائشی)، نائیک آصف خان (عمر 28 سال، ضلع کرک کے رہائشی)، نائیک مشکور علی (عمر 28 سال، ضلع اورکزئی کے رہائشی)، سپاہی طارق نواز (عمر 26 سال، ضلع لکی مروت کے رہائشی)، سپاہی واجد احمد فیض (عمر 28 سال، ضلع باغ کے رہائشی)، سپاہی محمد عاصم (عمر 22 سال، ضلع کرک کے رہائشی) اور سپاہی محمد کاشف خان (عمر 28 سال، ضلع کوہاٹ کے رہائشی) کے طور پر کی ہے۔

آئی ایس پی آر نے کہا کہ علاقے میں موجود کسی بھی دہشت گرد کو ختم کرنے کے لیے علاقے میں سینیٹائزیشن آپریشن کی جا رہی ہے اور اس گھناؤنے اور بزدلانہ فعل کے مرتکب افراد کو انصاف کے کٹہرے میں لایا جائے گا۔

آئی ایس پی آر نے کہا کہ یہ حملہ بلوچستان کی ترقی اور استحکام کو سبوتاژ کرنے کی ایک کوشش ہے۔ بیان میں مزید کہا گیا کہ قوم بھارت اور اس کی پراکسیوں کے مذموم عزائم کو شکست دے گی۔