سیکیورٹی فورسز نے بدھ کی رات شمالی وزیرستان کے علاقے میر علی میں ایک انٹیلیجنس بنیاد پر   آپریشن کیا جس میں چھ دہشت گردوں کو ہلاک کیا گیا۔

آرمی کے شعبہ تعلقات عامہ کے بیان میں کہا گیا  کہ سیکیورٹی فورسز کو دہشت گردوں کی موجودگی کی اطلاع موصول ہوئی اور انہوں نے ان دہشت گردوں کے خلاف موثر کارروائی کرتے ہوئے انہیں ختم کر دیا۔

لیکن اس آپریشن کے دوران سیکیورٹی فورسز کو بھی  جانی نقصان اٹھانا پڑا، جس میں میجر حمزہ اسرار اور سپاہی محمد نعیم دہشت گردوں کی فائرنگ سے شہید ہو گئے۔ فوجی ترجمان نے بتایا کہ سیکیورٹی فورسز نے لازوال قربانیاں دے کر شہادت کو گلے لگایا۔

آئی ایس پی آر کے مطابق  علاقے میں موجود کسی بھی دیگر خارجی کو ختم کرنے کے لیے آپریشن جاری ہے۔ اور پاکستان کی سیکیورٹی فورسز دہشت گردی کے خاتمے کے لیے پرعزم ہیں اور ہمارے بہادر فوجیوں کی ایسی  لازوال قربانیاں ہمارے عزم کو مزید مضبوط بناتی ہیں۔ فوج نے سال 2024 میں کل 59,775 انٹیلی جنس پر مبنی آپریشنز کیے، جن میں کم از کم 925 دہشت گرد ہلاک ہوئے۔ آئی ایس پی آر کے مطابق، اس میں 73 انتہائی مطلوب دہشت گرد بھی شامل تھے۔ یہ سال سیکیورٹی فورسز اور عام شہریوں کے لیے دہشتگردی کے حوالے سے انتہائی مہلک ثابت ہوا جس میں 2,000 سے زائد افراد ہلاک ہوئے۔