په بنو کې د پولیسو او هاتۍ خېل قبیلې د ګډو عملیاتو پر مهال د شنبې په ورځ دوه ترهګر وژل شوي دي. د پولیسو د چارواکو په وینا، د عملیاتو پر مهال د ترهګرو مړي هم ترلاسه شوي دي.
پولیس وايي چې د عملیاتو پر مهال ترهګر چاپېره کړل شول او د ډزو په نښته کې ګڼ نور ترهګر هم ټپیان شول. دا عملیات د احمدزۍ په پولیس تاڼه د پرون ماښام ترهګریز برید وروسته ترسره شول.
چارواکي زیاتوي چې ترهګر خپل وژل شوي او ټپیان ملګري خوندي ځای ته لېږدول، چې د ترخې اوبه په سیمه کې د هاتۍ خېل قبیلې له خلکو سره مخامخ شول، او له دې سره سخته نښته رامنځته شوه.
له پېښې وروسته، د بنو ډي آی جي سجاد خان سیمې ته د پولیسو پراخه ځواک ولېږه او د پراخ لټون عملیاتو امر یې وکړ. هغه وویل چې د سیمې امنیت لوړ کچې ته رسول شوی او د ترهګرو پرضد ګېره لا پسې ټينګې شوې ده.
ډي آی جي سجاد خان وویل چې د سیمې امن به په هر صورت بېرته راګرځول کېږي. نوموړي زیاته کړه چې د سیمې خلک په بشپړه توګه متحد دي او د ترهګرۍ تر بشپړ له منځه وړلو به عملیات روان وي.
امنیتي ځواکونه د سیمې په بېلابېلو برخو کې ځای پر ځای شوي او لټون عملیات دوام لري.
