د ایران د ملي امنیت عالي شورا سکرټر علي لاریجاني د سه‌شنبې په ورځ د پاکستان له مرستیال صدراعظم اسحاق ډار سره ولیدل. په دې لیدنه کې دواړو هېوادونو د سیمې او نړیوالو مسئلو په اړه د همکارۍ د پیاوړتیا ژمنه تازه کړه.

د پاکستان د بهرنیو چارو وزارت د معلوماتو له مخې، دواړو مشرانو د اسلام‌اباد او تهران ترمنځ د دوه اړخیزو اړیکو د لا ژورولو پرېکړه هم وکړه. دغه جزئیات وزارت په ټولنیز پلیټفارم ایکس (X) کې خپاره کړي دي.

علي لاریجاني د دوشنبې په ورځ پاکستان ته رسېدلی او تمه کېږي چې د سفر پر مهال به د هېواد له سیاسي او پوځي مشرانو سره هم وګوري. دا په یوه میاشت کې پاکستان ته د ایران د لوړپوړي پلاوي دوهم سفر دی. تېرې میاشتې د ایران د پارلمان رئیس باقر قالیباف هم اسلام‌اباد ته سفر کړی و.

له سفر وړاندې، لاریجاني په ایکس کې لیکلي وو چې ایران او پاکستان “د سیمې دوه مهم او اغېزمن هېوادونه دي چې د تلپاتې امنیت په ټینګښت کې مرسته کوي.” هغه زیاته کړې وه چې ایران د سیمې د هېوادونو ورورګلې اړیکې تل ارزښتمنې ګڼي.

لاریجاني همدارنګه ویلي چې ایراني ولس به “هېره نه کړي” هغه ملاتړ چې د ایران او اسرایلو د جون میاشتې د ۱۲ ورځنۍ جګړې پر مهال د پاکستان خلکو ښکاره کړی و.

په همدې تړاو، په پاکستان کې د ایران سفیر ډاکټر رضا امیري مقدم د لاریجاني سفر په ایکس کې “غیرمعمولي” بللی دی. ده ویلي چې دا سفر یو تاریخي ګام او مهم بدلون دی، ځکه چې د دواړو وروڼو هېوادونو قوي او ازمویل شوې اړیکې نوي ستراتیژیک پړاو ته داخلېږي.

سفیر ټینګار کړی چې د بدلېدونکي نړیوال حالت او په سیمه کې د نوو تحولاتو له امله د ایران–پاکستان اړیکو ته د پخوا په پرتله لا ډېره ستراتیژیکه اړتیا پیدا شوې ده، او تمه ده چې دا مهم سفر به دغه موخه نور هم پر مخ یوسي.