د اطلاعاتو وفاقي وزیر عطاءالله تارړ د اسلام‌اباد په کچهرۍ کې د نومبر پر ۱۱مه ترسره شوي ځانمرګي برید په اړه د یوې خبري ناستې پر مهال مهم جزئیات شریک کړل. هغه وویل چې د استخباراتو ادارې (IB) او د ترهګرۍ ضد څانګې (CTD) د برید له پېښېدو یوازې څو ساعته وروسته او د ۴۸ ساعتونو په دننه کې څلور مهم ملزمان نیولي دي.

د وزیر په وینا، نیول شوي کسان ساجدالله عرف شېنا، کامران خان، محمد ذالي او شاه منیر دي.

عطاءالله تارړ څرګنده کړه چې ساجدالله عرف شېنا د ځانمرګي بریدکوونکي او د جیکټ راوړونکی و. هغه په ۲۰۱۵ کې د تحریک طالبان افغانستان (TTA) سره یوځای شوی و او په افغانستان کې یې په بېلابېلو روزنیزو مرکزونو کې پوځي روزنه ترلاسه کړې وه.

وزیر وویل چې د ترهګرو اصلي هدف د راولپنډۍ او اسلام‌اباد لوړ امنیتي سیمې وې، خو ځانمرګی بریدکوونکی د سختو امنیتي تدابیرو له امله هلته رسېدلی نه شو او په اسلام‌اباد اړولو سیمو کې یې لومړۍ موقعیت په نښه کړ. عطاءالله تارړ زیاته کړه چې د الله شکر دی، هېواد له لوی ناورین څخه وژغورل شو.

هغه وویل چې په دې برید کې د اسلام‌اباد ضلعې محکمې د په نښه کولو پلان د فتنه‌الخوارج ډلې او د تحریک طالبان پاکستان مشر نور ولي محسود کړی و، چې خپل کمانډر دادالله ته یې د برید د ترتیب مسؤولیت سپارلی و. دادالله دا مهال په افغانستان کې دی.

په افغانستان کې لیدنې او سپارښتنې

عطاءالله تارړ د برید د پلان جوړونې تفصیل داسې بیان کړ:
په اګست ۲۰۲۵ کې ساجدالله عرف شېنا او محمد ذالي یوځای افغانستان ته ولاړل. هغوی د شېګل ولسوالۍ په یوه سیمه کې د فتنه‌الخوارج له غړي عبدالله جان عرف ابو حمزه سره ولیدل، او وروسته کابل ته ولاړل. په کابل کې یې له دادالله سره د ځانمرګي برید پلان وروستی کړ.

وزیر وویل چې دادالله دوی ته د نور ولي محسود پیغامونه او سپارښتنې ورکړې او ورته یې د راولپنډۍ او اسلام‌اباد په سیمو کې د ځانمرګي برید ځانګړي هدفونه وښودل.

هغه زیاته کړه چې ساجدالله او دادالله د یوې ځانګړې مخابراتي اپلېکېشن له لارې په دوامداره توګه په تماس کې وو. کله چې ساجدالله پاکستان ته بېرته راغی، نو د ځانمرګي بریدکوونکي عثمان شینواري سره ولیدل، چې د ننګرهار ولایت اوسېدونکی دی. ساجدالله هغه ته د ځانمرګي برید جیکټ او ټول اړین توکي ورکړل، او عثمان شینواري بیا په جي–۱۱ سیمه کې ځانمرګی برید ترسره کړ.

عطاءالله تارړ د استخباراتو ادارې او CTD کارونه وستایل او ویې ویل چې د دوی چټک عملیاتو په ۴۸ ساعتونو کې اصلي ملزمان ونیول او د دې ترهګرې شبکې ټولې کړۍ یې رابربنډې کړې.