خیبر پختونخوا کے اضلاع بنوں اور لکی مروت کے سرحدی علاقے، تختی خیل/ہوید میں دہشتگردوں کی موجودگی کی مصدقہ اطلاعات پر پولیس، کاؤنٹر ٹیررازم ڈیپارٹمنٹ (CTD) اور مقامی عوام نے مل کر ایک بڑا اور فیصلہ کن آپریشن مکمل کیا ہے۔ فائرنگ کے شدید تبادلے کے بعد آپریشن کو کامیاب قرار دیا گیا ہے جس میں اب تک 07 دہشتگردوں کی ڈیڈ باڈیز برآمد کر لی گئی ہیں۔
پولیس ذرائع کے مطابق یہ مشترکہ کارروائی تختی خیل/لنڈیڈاک کے عوام کی جانب سے دہشت گردوں کی موجودگی کی نشاندہی کے بعد شروع کی گئی۔ پولیس اور سی ٹی ڈی کے دستوں نے علاقے کا گھیراؤ کیا جسکے بعد فائرنگ کا تبادلہ شروع ہوا۔ حکام کے مطابق کامیاب کارروائی کے بعد علاقے میں مزید تلاش کا عمل جاری ہے۔
بعد ازاں، ڈی آئی جی سجاد خان نے ایک پریس کانفرنس کے دوران آپریشن کی تفصیلات سے آگاہ کیا اور بتایا کہ آپریشن کا دائرہ مزید وسیع کر دیا گیا ہے اور تازہ کارروائیوں میں مزید دہشتگردوں کو بھی ہلاک کیا گیا ہے۔ انہوں نے کہا کہ فورسز دہشتگردوں کے ٹھکانوں کی نشاندہی کر رہی ہیں اور علاقے کو مکمل طور پر کلیئر کیا جا رہا ہے۔
آر پی او سجاد خان نے قوم کو پیغام دیتے ہوئے کہا: ”یہ صرف ایک آپریشن نہیں بلکہ خطے میں مستقل امن کے قیام کی جانب ایک مضبوط پیش رفت ہے۔ خیبرپختونخوا پولیس عوام کے تحفظ کے لیے ہر قیمت ادا کرنے کو تیار ہے۔ دہشتگرد جہاں بھی ہوں انہیں انجام تک پہنچایا جائے گا۔”
ذرائع کے مطابق اس کامیاب آپریشن کی ایک اہم بات مقامی آبادی کا مثالی تعاون تھا۔ علاقہ مکینوں نے پولیس اور سیکیورٹی فورسز کا بھرپور ساتھ دیا۔ مقامی افراد نے مشکوک سرگرمیوں کی مسلسل نشاندہی کی جس نے کارروائی کو کامیاب بنانے میں کلیدی کردار ادا کیا۔
