د امریکا ولسمشر ډونلډ ټرمپ د شنبې په سهار له اسرائیله غوښتنه کړې چې پر غزه بمبار سمدستي ودروي. نوموړي ویلي، د حماس د وروستي بیان وروسته باور لري چې دا فلسطیني مقاومتي ډله د سولې لپاره چمتو ده.
تر دې مخکې، حماس د ولسمشر ټرمپ د غزې د شخړې د پای ته رسولو د پلان ځینې شرطونه منلي وو، چې پکې د یرغمالیانو خوشې کول هم شامل دي، خو د وسلو ایښودلو په څېر تر ټولو سختو موضوعاتو ته یې د ځواب ورکولو څخه ډډه وکړه او د نورو خبرو اترو هیله یې څرګنده کړه.
تر دې پرمختګ وروسته، ټرمپ د حماس ځواب په خپل “ټروت سوشیال” اکاونټ کې خپور کړ.
د اسرائیل لومړي وزیر بنیامین نتنیاهو د حماس له ځواب وروسته وویل چې اسرائیل د “ټرمپ د غزې د پلان د لومړي پړاو پر سمدستي عملي کولو” تیاری نیسي، چې هدف یې د اسرائیلي یرغمالیانو خوشې کول دي.
وروسته له دې، د اسرائیل رسنیو راپور ورکړ چې د هېواد سیاسي مشرتابه پوځ ته امر کړی چې په غزه کې بریدونه راکم کړي.
حماس په خپل بیان کې د ولسمشر ټرمپ د جګړې پای ته رسولو، د بندیانو د تبادلې او بېړنۍ مرستې د رسول غوښتنې ستاینه وکړه.
حماس وویل چې دوی “د ولسمشر ټرمپ د وړاندیز په چوکاټ کې د ټولو جنګي یرغمالیانو – ژوندي او پاتې شوني – د خوشې کولو” اعلان کوي، خو ورسره یې ټینګار وکړ چې د “ضروري میداني شرایطو” په اړه د خبرو لپاره چمتو دي.
مهمه خبره دا ده چې حماس د غزې د بې وسلې کولو او غیر پوځي کولو سره موافقه نه ده کړې، چې دا د امریکا او اسرائیل بنسټیز غوښتنلیک دی، خو حماس یې په تېرو کې هم رد کړی و. د حماس یوه لوړپوړي چارواکي الجزیرې ته ویلي چې تر هغې چې د غزې اشغال ختم نه شي، ډله به خپلې وسلې کېنږدي.
حماس دا هم ویلي چې دوی د غزې اداره یوې خپلواکې (تخنیکي) ادارې ته د سپارلو لپاره چمتو دي، چې د فلسطیني ملي توافق پر بنسټ جوړېږي او عربي او اسلامي هېوادونه یې ملاتړ کوي.
ولسمشر ټرمپ حماس ته د سولې پلان د منلو لپاره د یکشنبې تر شپې مهلت ورکړی و. ټرمپ ګواښ کړی و که دا “د وروستي فرصت تړون” ونه منل شي، نو پر حماس به داسې سخت عذاب راشي چې چا تر اوسه نه وي لیدلی.
یاده دې وي چې د نتنیاهو په ملاتړ دا وړاندیز کې د جګړې اوربند، د ۷۲ ساعتونو په موده کې د یرغمالیانو خوشې کېدل، د حماس بې وسلې کېدل، او د اسرائیل د غزې مرحلېز وتل شامل دي، چې وروسته به د ټرمپ په مشرۍ یو موقتي اداره جوړیږي.
د همدې اونۍ په اوږدو کې، د حماس د مشرانو نږدې سرچینو رسنیو ته ویلي وو چې اسلامي خوځښت د بې وسلې کېدو په ګډون د ځینو موادو په اړه د تعدیل غوښتونکی دی.
پاکستان د حماس ځواب د غزې د سولې په لور یو مثبت ګام بللی او ټینګار یې کړی چې باید سمدستي اوربند رامنځته شي.
د بهرنیو چارو وزیر او مرستیال صدراعظم اسحاق ډار په “ایکس” کې په خپل پیغام کې ویلي چې د حماس تیاري باید د فلسطیني ولس د کړاوونو د پای، د ټولو یرغمالیانو د خوشې کولو او د بشري مرستو د بې خنډه رسولو په پایله کې بدله شي.
اسحاق ډار روښانه کړې چې “اسرائیل باید سملاسي خپل بریدونه ودروي.”
هغه زیاته کړې چې پاکستان یو ځل بیا د فلسطین د قضیې لپاره خپل نه بدلیدونکی ملاتړ تکراروي. پاکستان پر خپل اصولي دریځ ولاړ دی، او دایمي حل د ۱۹۶۷ سرحدونو پر بنسټ د یو خپلواک او د عمل وړ فلسطیني دولت جوړېدل دي، چې پلازمېنه یې بیت المقدس وي.
د غزې د مدني دفاع ادارې راپور ورکړی چې د غزې ښار پر سختو هوایي بمبارونو او د توپونو ګولیو بریدونه شوي دي. د اسرائیلي بریدونو له امله لږ تر لږه ۱۱ کسان وژل شوي دي.
ملګرو ملتونو یو ځل بیا ویلي چې په غزه کې هیڅ ځای خوندي نه دی، او هغه سیمې چې اسرائیل د خوندي کولو لپاره اعلان کړې، د “مرګ ځایونه” ګرځېدلي دي.
لکه څنګه چې جګړه د دوو کلونو پوله ته نږدې شوې او د تلفاتو کچه لوړه شوې، د نړۍ په ګوټ ګوټ کې لاریون کوونکو د “ګلوبل صمود فلوټیلا” د مرستې بېړۍ د اسرائیل له لوري د درولو پر وړاندې سخت اعتراض کړی دی.
د فلسطین د روغتیا وزارت په وینا، د اسرائیلي بریدونو له امله تر اوسه له ۶۶،۲۸۸ ډېر فلسطینیان شهیدان شوي، چې له نیمایي زیات یې ښځې او ماشومان دي. دا عملیات د حماس د ۲۰۲۳ کال د اکتوبر په ۷ د برید په ځواب کې شوي چې پکې ۱،۲۱۹ اسرائیلیان وژل شوي وو.
