سیکیورٹی ذرائع کے مطابق کالعدم تنظیم ‘فتنہ الہندوستان’ (مجید بریگیڈ) کا ایک اہم دہشتگرد کمانڈر، گل رحمان عرف استاد مرید، افغانستان میں پراسرار طور پر ہلاک ہو گیا ہے۔

سیکیورٹی ذرائع نے تصدیق کی ہے کہ ہلاک ہونے والا دہشتگرد گل رحمان عرف استاد مرید جعفر ایکسپریس حملے کا ماسٹر مائنڈ تھا۔

بھارتی میڈیا اور سوشل میڈیا کے مطابق، فتنہ الہندوستان کا یہ دہشتگرد افغانستان کے صوبے ہلمند میں 17 ستمبر 2025 کو ہلاک ہوا ہے۔ ذرائع نے بتایا ہے کہ گل رحمان فتنہ الہندوستان (مجید بریگیڈ) کا ٹرینر اور آپریشنل کمانڈر تھا۔

دہشتگرد گل رحمان پر پاکستانی سیکیورٹی فورسز، چینی شہریوں، معصوم شہریوں اور مختلف اداروں پر حملوں میں ملوث ہونے کا الزام تھا۔ ذرائع کے مطابق، فتنہ الہندوستان نے پاکستان میں نہتے معصوم شہریوں، سیکیورٹی فورسز اور سی پیک منصوبوں کو نشانہ بنایا۔

سیکیورٹی زرائع کے مطابق گل رحمان نے جعفر ایکسپریس، کراچی میں چینی قونصلیٹ، گوادر پی سی ہوٹل، خضدار سکول بس دھماکہ، کراچی میں کنفیوشس انسٹیٹوٹ خود کش دھماکہ، پاکستان اسٹاک ایکسچینج حملہ اور کوئٹہ ریلوے اسٹیشن جیسی دہشتگردانہ کاروائیاں کیں۔

ذرائع کے مطابق، امریکہ فتنہ الہندوستان کے مجید بریگیڈ کو عالمی دہشتگرد تنظیم قرار دے چکا ہے۔ پاکستان اور چین بھی اس تنظیم کو اقوام متحدہ کی دہشتگرد فہرست میں شامل کرنے کا مطالبہ کر چکے ہیں۔

ذرائع نے اس ہلاکت کو اس بات کا ثبوت قرار دیا ہے کہ افغان سرزمین پاکستان میں دہشتگردی کے لیے استعمال ہو رہی ہے۔