سیکیورٹی فورسز نے بلوچستان کے ضلع خضدار میں دہشت گردوں کی موجودگی کی خفیہ اطلاع پر ایک کامیاب انٹیلی جنس بیسڈ آپریشن کیا ہے۔
پاک فوج کے شعبہ تعلقات عامہ کے مطابق بدھ کے روز کیے گئے آپریشن کے دوران سیکیورٹی فورسز نے دہشت گردوں کے ٹھکانے کو مؤثر طریقے سے نشانہ بنایا ۔ بیان میں بتایا گیا کہ شدید فائرنگ کے تبادلے کے بعد بھارتی سرپرستی یافتہ چار دہشت گردوں کو جہنم واصل کر دیا گیا ہے۔
آئی ایس پی آر کے مطابق ہلاک ہونے والے یہ دہشت گرد علاقے میں متعدد دہشت گردانہ سرگرمیوں میں ملوث تھے۔ دہشت گردوں کے قبضے سے اسلحہ، گولہ بارود اور دھماکہ خیز مواد بھی بھاری مقدار میں برآمد کیا گیا۔
بیان کے مطابق علاقے میں موجود کسی بھی دیگر دہشت گرد کے خاتمے کے لیے کلیئرنس آپریشن جاری ہے۔
آئی ایس پی آر نے بتایا کہ سیکیورٹی فورسز، پاکستان سے بھارتی اسپانسرڈ دہشت گردی کے ناسور کو جڑ سے اکھاڑ پھینکنے کے لیے پُرعزم ہیں۔ انہوں نے بتایا کہ قوم کے غیر متزلزل عزم کے ساتھ، دہشت گردی کے تمام سہولت کاروں اور مجرموں کو انصاف کے کٹہرے میں لایا جائے گا۔
