پاک فوج کے شعبہ تعلقات عامہ کے مطابق بلوچستان کے ضلع کیچ کے علاقے شیر بندی میں ایک افسوس ناک واقعہ پیش آیا جب سیکیورٹی فورسز پر ایک دیسی ساختہ بم کا حملہ کیا گیا۔ آئی ایس پی آر نے اپنے بیان میں بتایا کہ یہ دھماکہ اس وقت ہوا جب سیکیورٹی اہلکار علاقے میں ایک کلئیرنس کی کارروائی کے لیے جا رہے تھے۔ انہوں نے بتایا کہ اس حملے میں پاکستانی فوج کے 5 بہادر سپوت شہید ہو گئے، جنہوں نے ملک کے لیے اپنی جان کا نذرانہ پیش کیا۔

آئی ایس پی آر نے بتایا کہ شہداء میں کیپٹن وقار احمد (عمر 25 سال، ساکن ضلع لورالائی)، نائیک عصمت اللہ (عمر 35 سال، ساکن ضلع ڈیرہ غازی خان)، لانس نائیک جنید احمد (عمر 29 سال، ساکن ضلع سکھر)، لانس نائیک خان محمد (عمر 29 سال، ساکن ضلع مردان) اور سپاہی محمد ظہور (عمر 28 سال، ساکن ضلع صوابی) شامل ہیں۔ ان بہادر جوانوں نے ملک و قوم کی حفاظت کے لیے اپنی جانیں قربان کیں۔

آئی ایس پی آر نے بتایا کہ دہشت گردوں کے خلاف جوابی کارروائی میں سیکیورٹی فورسز نے 5 دہشت گردوں کو جہنم واصل کر دیا۔ بیان میں مزید کہا گیا کہ یہ دہشت گرد تنظیم "فتنہ الہند” کے رکن تھے۔ انہوں نے کہا کہ سیکیورٹی فورسز کی طرف سے علاقے میں مزید آپریشن جاری ہے تاکہ باقی ماندہ دہشت گردوں کا مکمل صفایا کیا جا سکے۔

آئی ایس پی آر نے بتایا کہ پاک فوج کے جوانوں کی یہ قربانیاں ہمارے حوصلوں کو مزید مضبوط کرتی ہیں۔ پوری قوم اور سیکیورٹی فورسز مل کر ملک سے دہشت گردی کے خاتمے کے لیے پرعزم ہیں۔