خیبر پختونخوا کے قبائلی ضلع جنوبی وزیرستان لوئر سے ضلعی انتظامیہ کی نگرانی میں افغان پناہ گزینوں کی اپنے وطن واپسی کا مرحلہ وار عمل جاری ہے۔ ڈپٹی کمشنر مسرت زمان کے مطابق، گزشتہ دو ہفتوں میں 1400 سے زائد افغان مہاجرین رضاکارانہ طور پر انگوراڈا بارڈر کے راستے افغانستان واپس جا چکے ہیں۔

ضلعی انتظامیہ کے مطابق واپس جانے والوں میں مرد، خواتین، اور چھوٹے بچے شامل ہیں۔ انتطامیہ نے بتایا ہے کہ ان کی سہولت کے لیے انگوراڈا بارڈر پر ایک پناہ گاہ قائم کی گئی ہے جس میں رہائش کے لیے 50 بستروں کی گنجائش موجود ہے۔ اس پناہ گاہ میں مہاجرین کو پانی، بجلی، اور کھانے کی سہولت فراہم کی جا رہی ہے۔

ڈپٹی کمشنر مسرت زمان نے مزید بتایا کہ ایگری پارک وانا میں بھی افغان پناہ گزینوں کے لیے عارضی خیمے لگائے گئے ہیں، جہاں انہیں تمام ضروری سہولیات فراہم کی جا رہی ہیں۔ انہوں نے واضح کیا کہ واپسی کا یہ عمل ضلعی انتظامیہ اور فورسز کی نگرانی میں مکمل طور پر پرامن طریقے سے جاری ہے۔