د پاکستان وزیراعظم شهباز شریف او بهرنیو چارو وزیر اسحاق ډار دوه ورځې وروسته له هغه قطر ته روان شول چې د اسراییلو په هوایي بریدونو کې په دوحه کې شپږ کسان ووژل شول. چې دا کار یې د یووالي او سیمه ییز اتحاد نښه وبلله.
د بهرنیو چارو وزارت په یوه بیان کې د اسراییلو برید بزدلانه بللی او ویلي یې دي چې دا په قطري دارالخلافه کې پر استوګنیزو سیمو شوی دی.
وزارت په خپل بیان کې زیاته کړه چي دا سفر د قطر د امنیت او خپلواکۍ لپاره د پاکستان نه شلیدونکی ملاتړ او په منځني ختیځ کې سولې او ثبات ته ژمنتیا ښیي.
په بیان کې دا هم ویل شوي چې وزیراعظم به په دوحه کې له شیخ تمیم بن حمد آل ثاني سره وویني ترڅو د قطر مشرتابه او خلکو ته د پاکستان ژوره خواخوږي او ملاتړ څرګند کړي.
اسرائیلو د حماس د مشرتابه غونډه په نښه کړې وه چې د امریکا د ولسمشر ډونلډ ټرمپ لخوا وړاندې شوي د غزې د اوربند پر پلان یې غور کاوه. قطر دا بریدونه د خپل حاکمیت سرغړونه بللې ده.
