پس از زلزلهٔ مرگبار در شرق افغانستان، شمار قربانیان همچنان رو به افزایش است. بر اساس آمار تازه، تاکنون بیش از ۸۰۰ تن شهید و بیش از ۲۰۰۰ تن دیگر زخمی شده‌اند.
هم‌زمان، شماری از شخصیت‌های داخلی با بازماندگان ابراز همدردی کرده‌اند. حامد کرزی رئیس‌جمهور پیشین، اشرف غنی احمدزی، داکتر عبدالله عبدالله و تعدادی از بازیکنان کرکت با خانواده‌های قربانیان ابراز تأسف نموده و از تاجران خواسته‌اند که با آسیب‌دیدگان همکاری و کمک کنند.
در سطح بین‌المللی نیز پیام‌های همدردی ارسال شده است. اسحاق دار وزیر خارجهٔ پاکستان، وزیر خارجهٔ ایران و سفیر جاپان در افغانستان با قربانیان این حادثه ابراز همدردی کرده‌اند.
ریچارد بنت، گزارشگر ویژهٔ حقوق بشر سازمان ملل متحد در امور افغانستان، در بیانیه‌ای اعلام کرد:
«از وقوع زلزلهٔ مرگبار در شرق افغانستان عمیقاً متأسف هستم. با خانواده‌های قربانیان و آسیب‌دیدگان ابراز همدردی می‌کنم و از جامعهٔ جهانی می‌خواهم برای کمک‌های فوری و حمایت‌های بشردوستانه به مردم افغانستان بشتابند.»
اتحادیهٔ اروپا نیز در بیانیه‌ای جداگانه ابراز همدردی کرد و نوشت:
«ما در کنار مردم افغانستان در این لحظات دشوار ایستاده‌ایم. تیم‌های بشردوستانهٔ اتحادیهٔ اروپا آمادهٔ ارائهٔ کمک‌های فوری در ولایت‌های کنر و ننگرهار هستند. هدف ما کاهش درد و رنج آسیب‌دیدگان و حمایت از خانواده‌های قربانیان است.»
