په بونیر خیبر پښتونخوا کښې د بارانونو او سیلابونو له امله لږ تر لږه ۹۱ کسان مړه شوي دي. دغه سیلابونه د ډګر، چغرزي، پیر بابا او ګګرې په برخو کښې راغلي دي. په ضلع کښې بیړنی حالت اعلان شوی دی.
د ډپټي کمشنر د دفتر په وینا تر دې دمه ۹۱ مړي روغتونونو ته وړل شوي دي. خو د ټپیانو دقیق شمیر نه دی معلوم، ځکه چې شمیر یې په سلګونو دی. د ژغورنې لپاره پولیس، ریسکیو ۱۱۲۲ او ملکي دفاع کار کوي.
په ټول خیبر پښتونخوا کښې د بارانونو له امله د وژل شویو کسانو شمیر ۱۹۰ ته رسیدلی دی. په باجوړ کښې ۲۱، په شانګله کښې ۲۳، په بټګرام کښې ۱۵، په مانسهره کښې ۱۴، په سوات کې ۱۱ او په لاندې دیر کې ۵ کسان مړه شوي دي.
له جون میاشتې راهیسې په ټول پاکستان کښې د سختو بارانونو او سیلابونو له امله تر ۳۲۵ ډېر کسان مړه شوي او ۷۴۳ کسان ټپیان شوي دي. په وژل شویو کسانو کښې ۱۴۲ ماشومان شامل دي. د پاکستان شمالي برخې او خیبر پښتونخوا تر ټولو ډېر زیانمن شوي دي. د ژغورنې عملیات دوام لري او د نورو معلوماتو په اړه به وروسته خبر ورکړل شي.
