خیبرپختونخوا کے ضلع سوات میں شدید بارشوں کے بعد پیدا ہونے والی سیلابی صورتحال میں ریسکیو 1122 کی ٹیمیں امدادی کارروائیوں میں مصروف ہیں۔ ترجمان ریسکیو 1122 سوات شفیقہ گل کے مطابق اب تک مجموعی طور پر 2071 افراد کو محفوظ مقامات پر منتقل کیا جا چکا ہے اور ریسکیو آپریشنز اب بھی جاری ہیں۔

اطلاعات کے مطابق سوات کے علاقے شریف آباد، بنگلہ دیش، لنڈی کس، ملا بابا، مکان باغ، میلہ پل، شگئی، فیض آباد، اور کوکارئی جیسے مختلف علاقوں سے 1450 سے زائد افراد کو محفوظ مقامات پر منتقل کیا گیا۔
تفصیلات کے مطابق سکول سے 200 اور شگئی پبلک سکول سے 100 طلبہ و طالبات کو بحفاظت نکالا گیا ہے۔ اسی طرح شاہی باغ قمبر میں 6، تبلیغی مرکز میں 3، اور ڈڈھارہ آریانہ ہوٹل کے قریب دریائے سوات میں پھنسے 6 افراد (بشمول دو خواتین اور دو بچے) کو بھی ریسکیو کیا گیا۔ سیدو شریف اللہ چوک کے قریب سیلابی ریلے میں پھنسی 6 خواتین کو بھی بچا لیا گیا۔

سرکاری ذرائع کے مطابق ریسکیو 1122 کے 217 اہلکاروں نے اس آپریشن میں حصہ لیا۔ ان اہلکاروں نے کشتیوں، حفاظتی جیکٹس، اور دیگر جدید آلات کا استعمال کرتے ہوئے مشکل ترین حالات میں بھی شہریوں کو بچایا۔ خیبرپختونخوا ریسکیو 1122 کے ڈائریکٹر آپریشن میر عالم، ڈائریکٹر آپریشن نارتھ ریجن ارشد اقبال، ڈپٹی ڈائریکٹر آپریشن نیاز علی، اور ڈسٹرکٹ ایمرجنسی آفیسر سوات رفیع اللہ مروت خود موقع پر موجود ہیں اور تمام کارروائیوں کی نگرانی کر رہے ہیں۔
ضلعی انتظامیہ کی جانب سے جاری تفصیلات کے مطابق ریسکیو 1122 کی ٹیمیں مسلسل فیلڈ میں موجود ہیں اور ہائی الرٹ ہیں۔ ریسکیو حکام نے عوام سے اپیل کی ہے کہ وہ سیلابی پانی کے قریب جانے سے گریز کریں اور کسی بھی ہنگامی صورتحال میں فوری طور پر 1122 پر رابطہ کریں۔