بلوچستان میں کوئٹہ سبی ریلوے سیکشن پر دہشت گردی کی ایک بڑی کارروائی کو ناکام بنا دیا گیا ہے۔ مقامی ذرائع کے مطابق سبی سے کوئٹہ جانے والی جعفر ایکسپریس کے گزرنے کے فوراً بعد ریلوے ٹریک پر نصب دھماکہ خیز مواد زور دار دھماکے سے پھٹ گیا۔ حکام کے مطابق اس کا مقصد ٹرین کو نشانہ بنانا تھا تاہم خوش قسمتی سے کوئی جانی یا مالی نقصان نہیں ہوا۔
تفصیلات کے مطابق یہ واقعہ اس وقت پیش آیا جب مسافروں سے بھری جعفر ایکسپریس ٹریک سے گزر چکی تھی۔ دھماکے کے بعد سیکیورٹی ادارے فوری طور پر حرکت میں آ گئے اور انہوں نے علاقے کو گھیرے میں لے کر سرچ آپریشن شروع کر دیا ہے۔
خبر کے مطابق بم ڈسپوزل اسکواڈ نے باقی ٹریک کا بھی معائنہ کیا تاکہ مزید کسی ناخوشگوار واقعے سے بچا جا سکے۔ حکام نے اس حملے کی شدید مذمت کی ہے اور اسے دہشت گردی کی کارروائی قرار دیا ہے جس کا مقصد شہریوں میں خوف و ہراس پھیلانا تھا۔ فی الحال، کسی بھی گروہ نے اس حملے کی ذمہ داری قبول نہیں کی ہے۔ سیکیورٹی ادارے مزید تفتیش کر رہے ہیں۔
