د پاکستان د خزانې وزیر محمد اورنګزیب د هېواد د راتلونکي په اړه یو جدي خبرداری ورکړی او د چټک نفوس زیاتوالی او اقلیمي بدلون یې د داسې ګواښونو په توګه په ګوته کړي چې د پایښت لرونکي اقتصادي پرمختګ مخه نیسي.
د درې ټریلیون ډالرو اقتصاد هدف
اورنګزیب د نړۍ د نفوسو ورځې په مناسبت یوې غونډې ته په وینا کښې ټینګار وکړ چې تر ۲۰۴۷ کال پورې د درې ټریلیون ډالرو اقتصاد ترلاسه کول به ناشوني وي که چیرې دې ننګونو ته په مستقیم ډول پام ونه شي.
وزیر د ۲.۵۵ سلنې نفوسو د ودې حیرانونکې کچې ته اشاره وکړه او ویې ویل چې دا په ملي پرمختګ، اقتصادي پلان جوړونې او ټولنیزې هوساینې منفي اغیزه کوي. هغه دا اندیښنه څرګنده کړه چې د پاکستان ۴۰ سلنه ماشومان چې عمرونه یې له پنځو کلونو کم دي. د ودې له پلوه کمزوري دي چې دا د هېواد راتلونکي مشرتابه ته خطر پېښوي. هغه د دې ستونزې د حل لپاره یوې هر اړخیزې تګلارې ته لېوالتیا وښوده. چې پکې د تغذیې، روغتیا ساتنې، پاکو اوبو ته لاسرسي، د اولادونو ترمنځ فاصلې او عامه پوهاوي زیاتوالی شامل دي.
اورنګزیب د ښځو پر پیاوړتیا هم ټینګار وکړ او د پایښت لرونکي پرمختګ لپاره یې په کاري ځواک کښې د دوی ډیر ګډون اړین وباله. هغه په زده کړو کښې پر کمزورۍ، په ځانګړي ډول د نجونو ترمنځ، د زده کړو او مهارتونو په پراختیا کښې د ډیرو پانګونو له لارې د مبارزې پر اړتیا ټینګار وکړ.
وزیر په ملي بجټ کښې د پام وړ بدلون غوښتنه وکړه او د اوسني بیلابیل فدرالي او ولایتي سیسټمونو پرځای یې د پراختیایي لګښتونو لپاره د یوې واحدې، ټول شموله ملي تګلارې وړاندیز وکړ. هغه یادونه وکړه چې ننګونه د فنډونو په شتون کښې نه ده (چې د فدرالي او ولایتي پراختیایي بودیجې مجموعه له ۵.۲ ټریلیون روپیو څخه ډیره ده)، بلکې د دوی په غوره تخصیص او لومړیتوبونو کښې ده.
هغه د مرسته کونکو د ښکیلتیا او پراختیایي تمویل د بیا تنظیمولو غوښتنه هم وکړه او د زیربناوو پر ځای یې د بشري پانګې پراختیا په ځانګړي توګه په روغتیا، زده کړو او نفوس پلان جوړونې کښې د پانګونو پر لور د بدلون پلوي وکړه. هغه د نړۍ بانک سره د پاکستان ۱۰ کلن هېوادني مشارکت چوکاټ ته اشاره وکړه. چې نږدې ۲۰ میلیارده ډالر (یا په کال کښې ۶۰۰-۷۰۰ میلیونه ډالر) نفوس پورې اړوندو اقداماتو ته ځانګړي کوي. هغه پر دې ټینګار وکړ چې د جنسي کنټرول پر توکو د مالیې کمولو په څیر د سمبولیکو اقداماتو هاخوا د اغیزمنو پانګونو اړتیا شته.
د پایښت لرونکي حلونو ژمنه
اورنګزیب په پای کښې د اوږدمهاله، پایښت لرونکو حلونو په اړه د حکومت پر ژمنې بیا ټینګار وکړ او ویې ویل چې دوی به کورني او نړیوالې سرچینې دواړه وکاروي ترڅو یو سالم او ګټور هېواد جوړ کړي. هغه پر سیاستوالو او پراختیایي شریکانو غږ وکړ چې بشري پانګې پراختیا ته لومړیتوب ورکړي او ویې ویل چي مونږ سړکونه او د بریښنا پروژې جوړې کړې دي. مګر اوس وخت دی چې پر خلکو پانګونه وکړو. دا یوازینۍ لار ده چې ریښتینی، ټول شموله او پایښت لرونکی پرمختګ ډاډمن کړو. په دې غونډه کښې څو وزیرانو او د بیلابیلو برخو نامتو شخصیتونو برخه اخیستې وه.
