پاکستانی پاسپورٹ کی عالمی درجہ بندی میں نمایاں بہتری کے بعد، پاکستانی شہری اب 32 ممالک میں ویزا فری یا ویزا آن ارائیول کی سہولت سے لطف اندوز ہو سکتے ہیں۔

ہینلے اینڈ پارٹنرز (Henley & Partners) جو کہ ایک معروف عالمی شہریت مشاورتی فرم ہے جس کی تازہ ترین رپورٹ کے مطابق پاکستان کا پاسپورٹ 2021 میں 113ویں نمبر سے ترقی کر کے دنیا بھر میں 100ویں نمبر پر آ گیا ہے۔ اس پیشرفت کو پاکستان کی فعال سفارتی سرگرمیوں اور مضبوط بین الاقوامی تعلقات کا نتیجہ قرار دیا جا رہا ہے۔

یہ مثبت پیش رفت پاکستان اور متحدہ عرب امارات (یو اے ای) کے درمیان ایک نئے معاہدے کے ساتھ ہوئی ہے جس کے تحت دونوں ممالک کے سفارتی اور سرکاری پاسپورٹ رکھنے والے افراد کے لیے ویزا فری سفر کی اجازت ہوگی۔ یہ پیشرفت مسافروں کے لیے سفر سے پہلے ویزا کی رسمی کارروائیوں کو ختم کرتا ہے اور توقع ہے کہ اس سے دوطرفہ تعاون میں اضافہ ہوگا۔

ویزا چھوٹ پر پاکستان-یو اے ای مشترکہ وزارتی کمیشن کے 12ویں اجلاس کے دوران اتفاق کیا گیا جہاں دونوں فریقین نے اس سلسلے میں ایک مفاہمت نامے پر دستخط کیے ہیں ۔

نائب وزیراعظم اور وزیر خارجہ اسحاق ڈار نے سوشل میڈیا پلیٹ فارم X پر ایک پوسٹ میں تصدیق کی کہ انہوں نے یو اے ای کے وزیر خارجہ شیخ عبداللہ بن زاید النہیان کے ساتھ اس معاہدے پر دستخط کیے ہیں۔ انہوں نے اس اقدام کو "ادارہ جاتی تعاون کو گہرا کرنے اور ہمارے برادرانہ تعلقات کو مضبوط بنانے” کی جانب ایک اہم قدم قرار دیا۔

حکام نے اس اقدام کا خیرمقدم کیا ہے، جس میں سرکاری سفر کو آسان بنانے اور اسلام آباد اور ابوظہبی کے درمیان اعتماد اور سفارتی شراکت داری کو مزید مضبوط بنانے کی صلاحیت کو اجاگر کیا گیا ہے۔