پاک فوج کے شعبہ تعلقات عامہ کے مطابق فیلڈ مارشل سید عاصم منیر، نشان امتیاز (ملٹری)، چیف آف آرمی اسٹاف نے سیاسی قیادت، مسلح افواج کے غیر متزلزل عزم اور معرکہ حق، آپریشن بنیان المرصوص کے دوران پاکستانی عوام کے ناقابل تسخیر جذبے کو خراج تحسین پیش کرنے کے لیے ایک عشائیے کا اہتمام کیا۔
عشائیے میں صدر مملکت آصف علی زرداری، وزیراعظم محمد شہباز شریف، ڈپٹی وزیراعظم/ وزیر خارجہ، چیئرمین سینیٹ، اسپیکر قومی اسمبلی، وفاقی وزراء، گورنرز، وزرائے اعلیٰ، چیئرمین جوائنٹ چیفس آف اسٹاف کمیٹی، چیف آف ایئر اینڈ نیول اسٹاف، بڑی سیاسی جماعتوں کی سینئر قیادت، اعلیٰ حکومتی عہدیداران اور تینوں سروسز کے سینئر افسران شامل تھے۔
شرکاء نے بصیرت افروز قیادت کو خراج تحسین پیش کیا جس نے قوم کو ایک فیصلہ کن لمحے سے نکالا، مسلح افواج کی ہمت اور قربانی کو سراہا اور پاکستانی عوام کی غیر متزلزل حب الوطنی کی تعریف کی ہے ۔
آئی ایس پی آر نے بتایا کہ چیف آف آرمی اسٹاف نے معرکہ حق کے دوران سیاسی قیادت کی تزویراتی بصیرت پر گہرا شکریہ ادا کیا اور آپریشن بنیان المرصوص میں آپریشنل کامیابی کو یقینی بنانے والی بین الخدماتی ہم آہنگی کو سراہا ہے۔
آرمی چیف نے پاکستانی نوجوانوں اور میڈیا کے بھارت کی جانب سے چلائی گئی غلط معلومات کی مہم کا مقابلہ کرنے میں ان کے غیر متزلزل کردار کو سراہا، انہیں بدنیتی پر مبنی پروپیگنڈے کے خلاف ‘فولادی دیوار’ قرار دیا ہے ۔
بیان میں مزید بتایا گیا کہ آرمی چیف نے پاکستانی سائنسدانوں، انجینئرز، اور سفارت کاروں کی شاندار خدمات کی بھی تعریف کی، جن کی پیشہ ورانہ مہارت اور عزم تنازعہ کے دوران انتہائی اہم ثابت ہوا ہے۔
آئی ایس پی آر کے مطابق یہ شام قومی اتحاد اور تجدید شدہ طاقت اور ہم آہنگی کے ساتھ آگے بڑھنے کے اجتماعی عزم کا ایک طاقتور مظاہرہ تھا۔
